អត់ឱនដល់អ្នកដទៃ

“ការអត់ឱនប្រៀបដូចជាការដោះលែងអ្នកទោសម្នាក់ ហើយអ្នកទោសនោះគឺជាខ្លួនអ្នក។” – Louis B. Smedes

ការបដិសេធមិនព្រមអត់ឱន មិនព្រមផ្តល់ការអភ័យទោស នឹងមិនធ្វើឱ្យនរណាម្នាក់មានអារម្មណ៍ល្អប្រសើរសោះឡើយ។ អ្វីៗដែលអ្នកកំពុងធ្វើ គឺការប្រកាន់ខ្ជាប់នូវអារម្មណ៍ខកចិត្ត ខឹងសម្បារ និងច្រណែន ដែលវាមិនផ្តល់ផលល្អសោះឡើយសម្រាប់អ្នក។ លោកអតីតប្រធានាធិបតីអាព្រិចខាងត្បូង ណែលសិន ម៉ាន់ដេឡា ធ្លាប់មានប្រសាសន៍ថា “ការខឹងគុំកួន និងមិនព្រមអត់ឱនចំពោះនរណាម្នាក់ ប្រៀបដូចជាការផឹកថ្នាំពុលចូលក្នុងខ្លួន ហើយសង្ឃឹមថា ម្នាក់នោះនឹងស្លាប់នាពេលខាងមុខ។”

ដើម្បីកសាងជីវិតរីករាយមួយសម្រាប់ខ្លួនអ្នក អ្នកត្រូវតែចេះផ្តល់ការអត់ឱនដល់អ្នក ដែលធ្លាប់បង្កការឈឺចាប់ដល់អ្នក ឬធ្លាប់ប្រមាថមើលងាយអ្នក។ អ្នកធ្វើបែបនេះ មិនមែនដោយសារទង្វើរបស់គេត្រឹមត្រូវ ឬដោយសារអ្នកអាចបំភ្លេចបាននូវអ្វីដែលគេប្រព្រឹត្តិមិនគប្បីចំពោះអ្នកទេ ប៉ុន្តែ គឺដោយសារវាជួយរំដោះអ្នកឱ្យរួចផុតពីអារម្មណ៍អវិជ្ជមាន ធ្វើឱ្យជីវិតអ្នករស់នៅជាមួយថាមពលវិជ្ជមាន និងក្តីរីករាយ។ ជាមួយនឹងការអត់ឱន វារុញអ្នកឱ្យចេញផុតពីដែននៃចិត្តសៅហ្មង ចិត្តអកុសល ដូចជាការរំដោះខ្លួនអ្នកចេញពីគុកនៃភាពងងឹត មួម៉ៅ ក្តៅក្រហាយ។ ជារឿងសំខាន់ណាស់ ដែលអ្នកត្រូវយល់ឱ្យបានច្បាស់ថា ការអត់ឱនអធ្យាស្រ័យដល់អ្នកដទៃ គឺអ្នកធ្វើដើម្បីសុខុមាលភាពរបស់អ្នក។

ការអត់ឱនដល់អ្នកដទៃមិនមែនជាសញ្ញានៃភាពអន់ទេ ហើយក៏មិនមែនមានន័យថា អ្នកមិនបានទទួលរងនូវការឈឺចាប់ចំពោះទង្វើរបស់គេកន្លងមកដែរ។ អ្វីដែលអ្នកកំពុងធ្វើ ក្នុងការផ្តល់ការអត់ឱនដល់អ្នកដទៃ គឺអ្នកចង់ប្រាប់ថា ខ្ញុំលែងខ្វល់និងលែងស្ថិតនៅជាមួយអារម្មណ៍អវិជ្ជមានចំពោះទង្វើរបស់អ្នកទៀតហើយ។ អ្នកកំពុងបង្ហាញភាពខ្លាំងក្នុងការធ្វើដំណើរបន្តទៅមុខ។ នៅពេលផ្តល់ការបង្រៀនដល់អ្នកដទៃ ខ្ញុំតែងមើលឃើញតួនាទីរបស់ខ្ញុំ ក្នុងការជួយគេឱ្យចេះអត់ឱនឱ្យអ្នកដទៃ និងខ្លួនឯងផងដែរ ក្នុងការបន្តដំណើរជីវិតទៅមុខទៀត។

ផ្តល់ការអត់ឱនដល់អ្នកដទៃ វាដើរទន្ទឹមគ្នាជាមួយការកសាងភាពជឿជាក់លើខ្លួនឯង និងជាមួយអ្នកដទៃឡើងវិញ។ នៅពេលដែលមានភាពល្អក់កករកើតឡើងនៅក្នុងទំនាក់ទំនង អ្នកមានជម្រើសក្នុងការដើរចេញពីគ្នា ឬកសាងភាពស្និទស្នាលឡើងវិញ។ ការអត់ឱនជួយអ្នកឱ្យចាកចេញពីអារម្មណ៍អវិជ្ជមាន ភាពមិនទុកចិត្តគ្នា និងចំណងនៃការខឹងគុំកួន ហើយជួយអ្នកក្នុងការកសាងទំនាក់ទំនងល្អឡើងវិញ។

“ដើម្បីបង្កើតជីវិតរីករាយនិងជោគជ័យ អ្នកត្រូវតែអាចផ្តល់ការអត់ឱនដល់អ្នកដទៃ ដែលធ្លាប់ធ្វើឱ្យអ្នកឈឺចាប់ ឬប្រមាថមើលងាយអ្នក។”

ប្រតិបត្តិជាក់ស្តែងក្នុងជីវិត

>> ស្មោះត្រង់ជាមួយខ្លួនឯងថា តើនៅទីណា ដែលការអត់ឱនត្រូវការចាំបាច់

ជាញឹកញាប់ យើងតែងបោកបញ្ឆោតចិត្តខ្លួនឯងថា យើងមិនមានអ្វីត្រូវអត់ឱនឱ្យអ្នកដទៃទេដូចជាការប្រើពាក្យថា ៖

· ពិតប្រាកដហើយ! ខ្ញុំមិនខឹងទេ ដែលខ្ញុំមិនត្រូវគេដំឡើងឋានៈនៅកន្លែងការងារ។
· មិនថ្វីទេ ដែលសហការីរបស់ខ្ញុំលួចគំនិតរបស់ខ្ញុំ ទៅបង្ហាញប្រាប់គេឯងថា ជាគំនិតរបស់គាត់។
· ទេ! ខ្ញុំមិនឈឺចាប់ទេ ដែលដៃគូរបស់ខ្ញុំបានផិតក្បត់ខ្ញុំ។

ចូរគិតពិចារណាមើលថា តើអ្វីដែលបានធ្វើឱ្យអ្នកឈឺចាប់ តែអ្នកបដិសេធ។ ចូរមានភាពស្មោះត្រង់ជាមួយខ្លួនឯង។ ជាញឹកញាប់ អ្នកតែងបង្ហាញប្រាប់អ្នកដទៃថា អ្នកមិនអីទេ! យើងតែងមិនចង់បង្ហាញអារម្មណ៍ពិតរបស់យើង ឱ្យគេដឹង ហើយនេះជារឿងធម្មតា។

បញ្ហាប្រឈម និងជារឿងធំចម្បង គឺការស្វែងរកពេលវេលាសមស្របសម្រាប់ផ្តល់ការអត់ឱនដល់មនុស្ស ដែលអ្នកត្រូវអត់ឱន ដើម្បីសេចក្តីសុខខ្លួនអ្នក។ វាអាចត្រូវការពេលរាប់ថ្ងៃ រាប់សប្តាហ៍ ឬក៏ច្រើនជាងនេះ ដើម្បីចិត្តអ្នកមានពេលវេលាគ្រប់គ្រាន់ក្នុងការផ្តល់ការអត់ឱន។ អ្នកអាចនឹងត្រូវការជំនួយពីនរណាម្នាក់ ដែលអ្នកទុកចិត្ត ដើម្បីជជែកអំពីអារម្មណ៍ពិតរបស់អ្នក និងអំពីវិធីនៃការផ្តល់ការអត់ឱនដល់អ្នកដទៃ។

>> ស្វែងរកផ្លូវសមស្របសម្រាប់ផ្តល់ការអត់ឱន

តើអ្នកផ្តល់ការអត់ឱនយ៉ាងណា វាជាជម្រើសផ្ទាល់ខ្លួនរបស់អ្នក ប៉ុន្តែ អ្នកត្រូវតែច្បាស់ខ្លួនឯងថា តើអ្នកត្រៀមខ្លួនសម្រាប់ការអត់ឱនដល់គេហើយឬនៅ។ ក្នុងករណីខ្លះ អ្នកអាចសម្រេច ដោយប្រាប់ផ្ទាល់អំពីការអត់ឱនរបស់អ្នកដល់គេ។ ការសរសេរក៏ជាជម្រើសដ៏ល្អដែរ ដែលអាចព្យាបាលឱ្យទំនាក់ទំនងជាសះស្បើយឡើងវិញ។ វាមិនសំខាន់ទេ ដែលថា តើគេចង់បាន ឬមិនចង់បានការអត់ឱននេះ។ ជម្រើសផ្សេងទៀត អ្នកគ្រាន់តែនិយាយប្រាប់គ្រួសារអ្នក ឬមិត្តជិតស្និទ្ធរបស់អ្នក ថាអ្នកបានអត់ឱនដល់បុគ្គលនោះហើយ ហើយអ្នកបន្តដំណើរទៅមុខទៀត ដោយលែងជាប់ជំពាក់នឹងការប្រកាន់ខឹងគាត់ទៀតហើយ។

អ្វីដែលសំខាន់បំផុតសម្រាប់អ្នក គឺអ្នកបានទម្លាក់ចោលនូវអារម្មណ៍ចងគំនុំ ខឹងសម្បារ អារម្មណ៍អវិជ្ជមាន ដែលបានស្ថិតនៅជាប់ក្នុងចិត្តរបស់អ្នក ធ្វើឱ្យជីវិតអ្នកមិនអាចរីករាយបាន តាមរយៈការផ្តល់ការអភ័យអត់ឱន ដល់អ្នកដែលបានប្រព្រឹត្តមិនគប្បីចំពោះអ្នកកន្លងមក។ ការអត់ឱនជួយឱ្យចិត្តប្រកាន់ចឹង អារម្មណ៍មិនល្អ ចាកចេញពីខ្លួនរបស់អ្នក ហើយអ្នកមានពេលចាប់យករឿងល្អៗ រឿងវិជ្ជមានមកបញ្ចូលក្នុងចិត្តរបស់អ្នក ដែលធ្វើឱ្យអ្នកមានអារម្មណ៍ល្អ ភ្លឺស្វាង ស្វាហាប់ និងមានសុខភាពល្អ សម្រាប់ការលូតលាស់ និងកសាងជោគជ័យសម្រាប់ជីវិតអ្នក។

=== ^^^ ===

> ប្រែសម្រួលដោយ សាម អ៊ីន -- កញ្ញា ២០២៤

ដកស្រង់ពីអត្ថបទ “Forgive others” in the book of Nigel Cumberland (2016): 100 things successful people do. Little exercises for successful living.

>> អត្ថបទទាក់ទង ៖