យល់ព្រមនឹងខ្លួនឯង

 

“ចូរស្រឡាញ់ខ្លួន យល់ព្រមនឹងខ្លួនឯង អត់ឱនឱ្យខ្លួនឯង និងធ្វើល្អចំពោះខ្លួនឯង ពីព្រោះថា បើខ្លួនឯងមានបញ្ហា រឿងល្អៗទាំងឡាយនឹងមិនកើតឡើងឡើយ។”​ – Leo F. Buscaglia 

ប្រសិនបើអ្នកធ្លាប់និយាយថា “ខ្ញុំស្អប់ខ្លួនឯង!” អ្នកមិនមែនជាមនុស្សតែម្នាក់ទេ​ ដែលប្រឈមនឹងបញ្ហានេះ។ យើងគ្រប់គ្នាសុទ្ធតែធ្លាប់ជួបក្នុងវគ្គណាមួយនៃជីវិតរបស់យើងនឹងរឿង ដែលធ្វើឱ្យយើងនឹកអាណិតខ្លួនឯង បន្ទោសខ្លួនឯងទៅលើរឿងដែលយើងបានធ្វើ ឬមិនបានធ្វើ ឬលើរឿងដែលយើងបាននិយាយ ឬមិនបាននិយាយ។ និយាយម្យ៉ាងទៀត គឺយើងរស់នៅដោយមិនសុខព្រមជាមួយអតីតកាល។

ជីវិតទំនើបនាពេលបច្ចុប្បន្នមិនបានធ្វើឱ្យមានភាពប្រសើរឡើងទេ។ តាមពិត វាធ្វើឱ្យងាយស្រួលពេកក្នុងការប្រៀបធៀបជាមួយជីវិតអ្នកដទៃ ដែលមើលទៅហាក់កំពុងរស់នៅដូចក្តីប្រាថ្នា ដែលអ្នកស្រមៃចង់បាន មានដូចជា៖

យើងមានអារម្មណ៍មិនល្អទៅលើទម្ងន់និងរូបរាងរបស់យើង ដោយសារតែយើងបានឃើញ និងប្រៀបធៀបជាមួយរូបរាងមនុស្សក្នុងកញ្ចក់ទូរទស្សន៍ ឬទស្សនាវត្តី ដែលគេបង្ហាញផ្សព្វផ្សាយពាណិជ្ជកម្មអំពីសម្រស់ និងសុខភាព។

បញ្ហានៃទំនាក់ទំនងគ្រួសារបានក្លាយជារឿងធំ ក្រោយពីទទួលបានមតិយោបល់ និងការទូន្មានផ្សេងៗពីអ្នកដទៃ ហើយយើងក៏ចាប់ផ្តើមប្រៀបធៀបជាមួយគ្រួសារគេ ដែលស្តាប់ទៅថាល្អប្រសើរជាង។

ការមើលឃើញរូបភាពនិងខ្លឹមសារតាមបណ្តាញសង្គម ដែលមើលទៅឃើញជីវិតគេហាក់បីដូចជាល្អប្រសើរច្រើនជាងយើង ធ្វើឱ្យយើងមានអារម្មណ៍មិនសប្បាយចិត្ត និងកាន់តែខ្វល់ច្រើន។

វាមានភាពពិតច្រើននៅក្នុងគំនិតមួយលែកលើកឡើងថា ការមិនបានដឹងគឺជាពរជ័យដ៏ប្រសើរ។ កាលពីសប្តាហ៍មុន ខ្ញុំបានផ្តល់ការប្រឹក្សាយោបល់ដល់មនុស្សម្នាក់ ដែលបានមើលព័ត៌មានតាម​ online និងប្រៀបធៀបតួនាទីនិងប្រាក់ខែគាត់ជាមួយអ្នកដទៃ ហើយបានសន្និដ្ឋានថា គាត់ទទួលបានប្រាក់ខែទាប បើប្រៀបធៀបនឹងគេ។ គាត់មានការខឹងមួម៉ៅនឹងខ្លួនឯង ដែលបានសម្រេចទទួលយកការងារមួយនេះរយៈពេល៥ឆ្នាំជាមួយនឹងប្រាក់ខែទាប។ ខ្ញុំបានរំលឹកប្រាប់ទៅគាត់ថា គាត់ធ្លាប់បំពេញការងារនេះដោយរីករាយ និងមិនមានបញ្ហាហិរញ្ញវត្ថុទេកន្លងមក ហើយពេលនេះ គាត់អាចស្វែងរកកន្លែងការងារថ្មីបាន។ ចូរបញ្ឈប់ការប្រៀបធៀបខ្លួនអ្នកនឹងអ្នកដទៃ បន្ទាប់មកអ្នកនឹងដឹងថា អ្វីៗដូចជាល្អប្រសើរ មិនមានបញ្ហាទេ។​

រឿងមិនល្អបន្ថែមទៀតគឺថា នៅពេលដែលអ្នកមានអារម្មណ៍ខឹងនឹងខ្លួនឯង វានឹងបង្កផលប៉ះពាល់ដល់អ្នកដទៃ ដែលនៅជិតអ្នក។​ ជាទូទៅ អ្នកនឹងផ្ទេរអារម្មណ៍អវិជ្ជមានបន្តទៅអ្នកដទៃ។ វាអាចកើតឡើងក្នុងទម្រង់នៃការប្រចណ្ឌ ភាពព្រងើយកន្តើយ ការគិតមិនល្អ ខឹងសម្បា ឬមានកាយវិការមិនសមរម្យ ដែលជាទង្វើទាំងឡាយ ដែលបុគ្គលជោគជ័យតែងចៀសឆ្ងាយ។

<< ចូរបញ្ឈប់ការប្រៀបធៀបខ្លួនអ្នកនឹងអ្នកដទៃ បន្ទាប់មកអ្នកនឹងដឹងថា អ្វីៗដូចជាល្អប្រសើរ មិនមានបញ្ហាទេ។​>>

++ កិច្ចប្រតិបត្តិ

+ យល់ព្រមនិងស្គាល់លក្ខណៈពិសេសរបស់ខ្លួន

អ្នកមានលក្ខណៈពិសេសខុសគេ​ ហេតុនេះហើយមិនគួរព្យាយាមប្រៀបធៀប ឬធ្វើត្រាប់តាមនរណាម្នាក់សោះឡើយ។ ចូរបញ្ឈប់ការខ្វល់ថា អ្នកដូចជាចូលសង្គមមិនចុះនឹងគេ។ ដូចនឹងអ្នកដទៃដែរ អ្នកតែងមានភាពចម្រុះលាយគ្នារវាងភាពខ្លាំងនិងភាពខ្សោយ ដូច្នេះចូរបញ្ឈប់ការបន្ទោសខ្លួនឯងចំពោះកំហុសឆ្គង ឬចំណុចខ្សោយរបស់អ្នក។

ជំនួសមកវិញ អ្នកគួរចាប់ផ្តើមចេះអរគុណនឹងអ្វីដែលអ្នកមាន និងអ្នកជាបុគ្គលបែបណា។ ចូរចាប់ផ្តើមរៀនដើរចេញពីទម្លាប់នៃការប្រៀបធៀបនឹងអ្នកដទៃ។ អ្នកនឹងមិនមានក្តីរីករាយសោះឡើយ បើអ្នកបន្តប្រៀបធៀបខ្លួនអ្នកនឹងអ្នកដទៃ។ វាតែងនឹងមាននរណាម្នាក់ ដែលមើលទៅមានទ្រព្យជាងអ្នក សប្បាយរីករាយជាងអ្នក មានសុខភាពល្អជាងអ្នក ស្រស់ស្អាតជាងអ្នក ឬមានដៃគូល្អប្រសើរជាងអ្នក។

+ សម្លឹងមើលរឿងវិជ្ជមាន

អ្នកអាចជួបថ្ងៃស៊យ ហើយនេះជារឿងធម្មតាក្នុងជីវិត។ អ្នកភ្លេចបិទទ្វារទូទឹកកកពេលចាកចេញពីផ្ទះ មានការប៉ះទង្គិចគ្នាពេលបើកបរ ភ្លេចយកវ៉ាលីពេលចុះពីឡានតាក់ស៊ី ឬភ្លេចទូរស័ព្ទដៃនៅហាងកាហ្វេ។

បើទោះបីអ្នកមានអាម្មណ៍មិនល្អចំពោះខ្លួនឯងយ៉ាងណាក៏ដោយ ចូរកុំជះអារម្មណ៍ទាំងនេះទៅលើអ្នកដទៃ។ ពិតហើយ អ្នកអាចនិយាយអំពីអារម្មណ៍ទាំងនេះ ឬរៀបរាប់ក្តីកង្វល់ទាំងឡាយប្រាប់អ្នកផ្សេង ដើម្បីបន្ធូរកំហឹង និងសម្រន់ការតូចចិត្ត តែកុំបង្កការឈឺចាប់ដល់អ្នកទាំងឡាយ ដែលនៅក្បែរអ្នក។ សូមកុំមួម៉ៅ ធ្វើព្រងើយកន្តើយ ឬនៅស្ងៀមខឹងមិននិយាយ។ នៅពេលដែលអ្នកសម្លឹងមើល ឬគិតលើរឿងវិជ្ជមាន ឬផ្តោតចិត្តលើដង្ហើមចេញនិងចូល អារម្មណ៍អវិជ្ជមានទាំងឡាយនឹងថមថយ។ គិតរឿងល្អវិជ្ជមាននឹងផ្តាច់ចរន្តសាំងក្នុងការបញ្ឆេះកំហឹង ឬបង្កើនកង្វល់។ ចូរទុកឱ្យអារម្មណ៍អវិជ្ជមានថមថយជាមួយពេលវេលា បន្ទាប់មកអ្នកដឹងថា វាមិនអីទេចំពោះរឿងរ៉ាវដែលកើតឡើងកន្លងមក។ នេះហើយជាវិថីនៃការស្រឡាញ់ខ្លួនឯង និងយល់ព្រមទទួលយកនូវរឿងរ៉ាវទាំងឡាយដែលកើតឡើង។

=== ^^^ ===

> ប្រែសម្រួលដោយ សាម អ៊ីន​ -- វិច្ឆិកា ២០២៥ 

  ដកស្រង់ពីអត្ថបទ “Accept yourself” in the book of Nigel Cumberland (2016): 100 things successful people do. Little exercises for successful living. 

>> អត្ថបទទាក់ទង ៖ 

១. យកអតីតកាលជាមិត្តរបស់អ្នក

២.​ ផ្តោតលើរឿងដែលអ្នកអាចគ្រប់គ្រងបាន